TIKVAH-ETHIOPIA

#Update #Gambella " የፓሊስ አባላትም ወደ አንድ ብሔር በማተኮር የግድያ ጥቃት ጥቃት ይፈጽማሉ " - ነዋሪዎች " ሁሉም ፓሊሶች ሳይሆን የተወሱት  ወንጀል (ጥቃት) የሚፈጽሙበት ሁኔታዎች አሉ፤ እንደተባለው ትክክል ነው " - የጋምቤላ ክልል ጸጥታ ቢሮ "ዛሬ የተገደለው የጋምቤላ ከተማ ፓሊስ አዛዥ ነው። ከቢሮው ወጥቶ ስራ እየሰራ ነበር፤ ወደቢሮ ሊመለስ ሲል ነው ጥቃቱ የተፈጸመው! " በጋምቤላ ክልል፣ ጋምቤላ ከተማ ዛሬ ረፋድ አካባቢ የተኩስ ልውውጥ እንደነበር፣ የከተማው ፓሊስ አባል እንደተገደሉ ነዋሪዎች የገለጹ ሲሆን፣ ክልሉም ድርጊቱ መፈጸሙን ዛሬ ምሽት ለቲክቫህ ኢትዮጵያ አረጋግጧል። ነዋሪዎቹ እንደሚሉት በክልሉ የተለያዩ ወረዳዎች ሰሞኑን ባገረሸው የጸጥታ ችግር ንጹሐንና የፓሊስ አባላት ሲገደሉ፣ የቆሰሉም አሉ። ችግሩ ከዓመት በፊት ይስተዋል እንደነበር በማስታወስ፣ ከሳምንታት ጀምሮ ማገርሸቱን ገልጸው፣ " የፓሊስ አባላትም ወደ አንድ ብሔር በማተኮር የግድያ ጥቃት ይፈጽማሉ " ሲሉ ወቅሰዋል። ቲክቫህ ኢትዮጵያ፣ ለጉዳዩ ምላሽ እንዲሰጡ የክልሉን ባለስጣናት ቢጠይቅም ባለመሳካቱ፣ የጋምቤላ ክልል ርዕሰ መስተደድር ወ/ሮ አለሚቱ ኦሞድን ጠይቋል። እሳቸውም ፥ " አሁን ስራ ላይ ናቸው ማታ ደውልላቸው። ከደወሉላችሁ አንሱ ብዬ እነግራቸዋለሁ። በተለያየ ሰው መልስ ሊሰጥ አይገባም፤ የጸጥታ አካሉ ስላለ እነርሱ ናቸው መስጠት ያለባቸው " ብለዋል። በኋላም፣ በተለያዩ ወረዳዎች ሰሞኑን በተስተዋለ የጸጥታ ችግር ንጹሐን ጭምር መገደላቸውን ፤ ዛሬም ከተማዋ ላይ ተኩስ እንደነበርና ፓሊስ እንደተገደለ ነዋሪዎች ገልጸዋል፤ ፓሊስ ተገድሏል መባሉ እውነት ነው ? በአጠቃላይ ችግሩን ለመቅረፍ ምን እየተሰራ ነው ? ስንል የክልሉን ሰላምና ጸጥታ ቢሮ ጠይቀናል። የጋምቤላ ክልል ሰላምና ጸጥታ ቢሮ ኃላፊ አቶ ማበር ኮር ለቲክቫህ ኢትዮጵያ ምን መለሱ ? " ዛሬ የሞተው የፓሊስ አባል ብቻ ነው እንጅ ሌላ የሞተ ሰው የለም። ድርጊቱ ሲፈጸም በቦታው አልነበርንም፤ የተገደለው የጋምቤላ ከተማ ፓሊስ አዛዥ ነው። ከቢሮው ወጥቶ ስራ እየሰራ ነበር፤ ወደቢሮ ሊመለስ ሲል ነው ጥቃቱ የተፈጸመው። ህዝቡም እንዲረጋጋ በየቀበሌው የማረጋጋት ስራ እየሰራን ነው። ዛሬ የተፈጠረው ችግር የማይጠበቅና ነው። ግን ወደ ከፋ ችግር እንዳይሄድ በስጋት ቀጠናዎች የጸጥታ ኃይሎች በመመደብ ህዝቡ ወደ ከፍተኛ ግጭት እንዳይገባ ተደርጓል። ሰሞኑን በክልሉ የተከሰተው አለመረጋጋት እንደ ክልል ብዙ ስራዎች ሰርተናል። በየወረዳ የውይይት መድረኮች ተካሂደዋል። ከጉዳዩ ጋር የተጠረጠሩ ወንጀሎች ተይዘዋል፤ ከጉዳዩ ጋር ግንኙነት ያላቸው በህግ ቁጥጥር እንዲውሉ አድርገናል " ብለዋል። ነዋሪዎቹ፣ " አንዳንድ የፓሊስ አካላት በንጹሐን ግድያ ተሳታፊ የሚሆኑበት፣ ወደአንዱ ብሔር የሚያደሉበት ሁኔታ እንዳለ " ይገልጻሉ፤ በጥቃቱ ጠርጥራችሁ ከያዛችኋቸው መካከል የጸጥታ ወይም የፓሊስ አባላት አሉ ? ለሚነሳው ቅሬታ ምላሻችሁ ምንድን ነው ? ሲል ቲክቫህ ኢትዮጵያ የቢሮ ኃላፊውን ጠይቋል። ኃላፊው አቶ ማበር፣ " ሰው ሲፈጠር ሙሉ ስላልሆነ፣ የሚጎድል ነገር ስላለ፣ ይህንን ነገር (ጥቃቱን) አያደርግም ማለት ሊከብድ ይችላል። ሁሉም ፓሊሶች ሳይሆን የተወሱት ወንጀል (ጥቃት) የሚፈጽሙበት ሁኔታዎች አሉ፤ እንደተባለው ትክክል ነው። ግን አጠቃላይ ፓሊስ አይደለም። አንዳንዶቹ በራሳቸው ችግር ምክንያት በእነዚህ የወንጀል ድርጊቶች የሚሳተፊበት ሁኔታዎች አሉ " ሲሉ መልሰዋል። በሰሞንኛው ጥቃት ንጹሐን መገደላቸው ተነግሯል፤ በትክክል ምን ያክል ናቸው የተገደሉት ? ተጠርጣሪዎችን መያዛችሁንም ገልጻችኋል፣ ስንት ናቸው ? የተጠረጠሩት በግድያ ወይስ በምንድን ነው? ግልጽ ብታደርጉት ? የሚል ተጨማሪ ጥያቄም ለኃላፊው አቅርበናል። ኃላፊው፣ " በእርግጥ ብዙ ሰው ሞቷል። ሁለት መኪናዎች በመንገድ ላይ ጥቃት ደርሶባቸው። በኢታንግ ልዩ ወረዳ አካባቢም ሁለት ሴቶች የተገደሉበት ሁኔታ ነበረ። ሲጠቃለል ግን 10 አይደርስም። ግን አንድ ሰው ቢሆንም ሞት ነውና እንደ ትልቅ ነገር መቆጠር አለበት፤ እየሰራንበት ነው " ብለዋል። " 18 ተጠርጠሪዎች በፓሊስ ተይዘዋል፤ ግን ከዚያ በላይ ናቸው። ያልተያዙ አሉ። በነፍስ ግድያ የተጠረጠሩ አሉ በዚያ ውስጥ፤ በተጨማሪም ግድያ እንዲፈጸም ሰዎችን ያደራጁ ሰዎች አሉ። መኪና መንገድ ላይ ጠብቆ ጥቃት የማድረስ፤ ከተማ ላይ ሰው በመግደል ወንጀሎች ነው ተጠርጥረው የተያዙት። ሌሎችንም ገና በማፈላለግ ላይ ነን" ነው ያሉት። የጸጥታ ችግሩ ምንጭ ምንድን ነው ? ከአንድ አመት በፊትም ተከስቶ ነበር፤ አሁን ያገረሸበት ምክንያት ምንድን ነው ? ችግር እንዳይቀጥል ቀድሞ መፍትሄ መስጠት ያልተቻለው ለምንድን ነው ? አሁን ችግሩ እንዳይቀጥልስ ምን እየተሰራ ነው? ለሚለው የቲክቫህ ኢትዮጵያ ጥያቄም የቢሮው ኃላፊ ምላሽ ሰጥተዋል። የሰላምና ጸጥታ ቢሮ ኃላፊው አቶ ማበር ምን መለሱ ? " ሁለት ብሔረሰቦች በሚገናኙባቸው ቦታዎች ይጋጫሉ ምንጊዜም፤ ግን እርቅ ተፈጥሮ፣ ህዝቡ ወደ አንድነት የመጣበት ሁኔታ ነበር። ከዚህ በፊት ስልጣን ላይ የነበሩት፣ ስልጣናቸው ዝቅ ተደርጎ የወረዱ አካላት ደስተኛ ስላልሆኑ እንደገና ከዚህ በፊት ሲከሰቱ የነበሩ ችግሮችን ለመፍጠር አልተኙም። ዋና ምንጩ እንደ ክልላችን ባገኘነው አንጻራዊ ሰላም ደስተኞች ያልሆኑ፤ ክልሉ ወደብጥብጥ እንዲገባ ወጣቶችን የሚገፋፉ አሉ። ሌላው ህገወጥ የሆኑ ሚዲያዎች ህዝቡ ተቻችሎ እንዲኖር የማይፈልጉ ስላሉ ክልሉ እንዳይረጋጋ እያደረጉ ነው። በኛ በኩል በውይይት የሚያምን ህዝብ ለመፍጠር በየደረጃው የማወያየት ስራ እየሰራን ነው። ህዝቡም ወንጀል ፈጻሚዎችን አጋልጦ ለህግ መስጠት አለበት " ብለዋል። ቲክቫህ ኢትዮጵያ አዲስ አበባ #TikvahEthiopiaFamilyAA @tikvahethiopia